سَمح الوصوفو كلمــات : حاج الماحي أداء : خالد الصحافه

سَمح الوصوفو يا رب نشوفو
حَرَمو وسُرُوفو نَعقِبْ نطوفو
الماحي سَمّ ونقّر دفوفو
مَدحاً مُوزّن فوق الحُروفو

بالألف.. الله ربي اللطوفو
بالباء .. بهلّو الأسرار في جوفو
بالتاء .... توانى مِسْكو العَسوفو
بالثاء .. ثنايا بَرقاً خَطوفو
يالجيم .. مجمّل سمحات وصوفو
بالحاء .. حُيُالو ضرع العجوفو
بالخاء .. لخلفو ينظر يشوفو
بالدال .. دَواياَ للصايبو جوفو
بالذال ..لى ذكراً شاع في الخيوفو

بالراء .. رؤفاً للناس عَطوفو
بالزين .. لى زياً يوي العَكوفو
بالسين .. يساعد للكان لهوفو
بالشين.. شفاعتو يوم الوقوفو
بالصاد .. صحابتو شايلين سيوفو
بالضاد .. يضوّي بين الألوفو
بالطاء .. مُطهّر قلبو الرؤفو
بالظاء.. يظِلّو الغيم رفوفو
بالعين ..علامتو فوق الكتوفو
بالغين .. غَفَرْلو وأمّن لى خوفو

بالفاء .. فهيماَ للسر كَشوفو
بالقاف .. يقفّل باب الخسوفو
بالكاف .. لى كفاَ ينبع سُرُوفو
باللام ..... لِماهو يا رب نشوفو
بالميم .. معاهو يوم الوقوفو
بالنون .. نروّح لى ذاك غوفو
بالهاء .. نهاجر ونسعى ونطوفو
بالواو .. ولامِن آخر الحروفو
بالياء.. يمينو يكرم ضيوفو

بردف سلامي فوق الملبى
طه الرضاهو مولاهو حب
خاتم النبوه اللاح نورو شب
جسمو المعطر نسامو هب
نعم النوالو لي قدودو عب
حادي القوافل ماريها خب
طاف بالعتيقه حج ولب
قضى الفرائض سافر لطيبه

يا ربّي سَآئلك تقبل لى مطلب
تديني جملاً كَبِيلي أصهب
مُو الدون قِصيّر وماهو المشقلب
أصهب بشاري طايع مأدب
صدراً مفجَّج في شوفتو ترغب
سَرجاَ سناري محكوم مذهب
والفروة مِرعِزْ اتنيها واركب
فوقو إن رفعت من حينو جَلّب
قُلتْ يا سلاماً أقبل وقبقب
تسمع مشيهو رجليهو طَبْ طَبْ
ينسف دوايرو بيناتا يلعب
ليهو المسافة تِنْصّرْوتقرب
الماحي فوقو بي مدحو يطرب
هوِّى ومُناي في ام سور وكوكب
القبة خضراء ونساما هبهب
نوصل نزورو وفي شفاعتو نُكتب

بختم صلاتي المقبول ثوابا
آلاف سلامي فاق الترابا
بي عد جبالا دنيا وحسابا
بي عد طوابا اليقرأ الكتابه
من حد بناها لـ اا يوم خرابا
يبسد حداها الماحي جابا
يا سيد عكاشه قول مرحبابا
تنجينا بيها يوم الحسابا

» مدحة سمح الوصوفو اولاد حاج الماحي
» مدحة الشوق لي الرسول الماحي كلمات ود تميم اداء اولاد الكباشي
» مدحة متين ياعاشقين نحدا الجمال اولاد حاج الماحي
» المادح السوداني حاج الماحي سيرته وأثره
» مدحة يا رحمان ارحم بى جودك لحاج الماحي